Brésil jamanaden Pelé, n’o ye diɲɛ ntolatanna ŋana fɔlɔ ye ani ntolatanna ŋana min ye fɛn caman sɛmɛntiya ntolatan na, o sara ka si tɔ san 82 la. A ka saya sɔrɔ la cancer bana dɔ de la, n'a tun b'a la san kelen ɲɔgɔn. A denmusɔw yere de y'a banni kuma fɔ alamisa dɔn.
"An y'i kanu dan tɛ kanu min na, k'i da yɔrɔ sumaya", Kely Nascimento y'o sɛbɛn instagram kan, o ye sɛbɛn ye, ni ntɔlatanna kɔrɔ ja jiralen don, n'a ka sɔkɔnɔmɔgɔw bolow kurulen ɲɔgɔn kan, Albert -Einstein dɔgɔtɔrɔso la, Sao Paulo dugu la, n'a tun bɛ furakɛli la yen kalo kelen ɲɔgɔn.
Dɔgɔtɔrɔso y'a jira a ka kunnafɔni sɛbɛn kɔnɔ ko nin saya in sababu sɔrɔla "a ka fari kɔlɔ sɛgɛn de la bana in kɔsɔn".
A kelen dɔrɔn de ye ntolatanna ye min ye diɲɛ ntolatanba ta siɲɛ saba (3) san (1958, 1962 ani sqn 1970), Pelé, n’a tɔgɔ yɛrɛ ye Edson Arantes do Nascimento ye, o sugandira ka kɛ san kɛmɛ (siècle) ntolatanna ŋana ye diɲɛ farikoloɲɛnajɛ jɛkulu fɛ min tɔgɔ Comité international olympique san 1999 la.
A ka saya laseli ye ntolatan kanubagaw bɛɛ kabakoya, tile tan ni kelen diɲɛ ntolatanba bannen kɔfɛ Qatar, ani san fila ni kɔ dɔrɔn Diego Maradona ka saya kɔfɛ.
Diɲɛ ntolatanba in bɛɛ kɔnɔna na, "masakɛ ntɔlatanna" tun ye kuma kanw dɔ lase ka tɔ Albert-Einstein dɔgɔtɔrɔso kɔnɔ, n'a tun donna yen novembre kalo tile 29, a ye Bresil fɔ, kɔ halisa u k'u cɛsiri. A ye Messi fɔ fana a ye sebaya min di, a ka jamana Argentine ma n'a ye Faransi bugɔ.
Nowɛli sɛli dɔn, a denmusow ye denbaya bɛɛ lajɛlen ka ja bila instagram kan, k’u ka waleɲumandɔn jira, k’a sɔrɔ dɛmɛ cikanw bɛ ka bɔn ka bɔ diɲɛ fan bɛɛ la.
Jumadon, Kely Nascimento ye ja dɔ bɔ min ye hinɛ dɔ mɔgɔw dusukunna. A b'a fa minɛ ni dususuma ye, a dalen dɔgɔtɔrɔso dilan
kan. An ye Pelé ɲɛda yɔrɔ dɔrɔn de jira ja in na, nin fiyɛ samala tun b'a nun na walasa ka ninakili dɛmɛ.
