Nin kiritigɛ in tɛ nafolotigiba Donald Trump ka cɛbɔya bali novembre kalo nata jamanakuntigi kalata la, n'a si bɛ san 77 na, ani Joe Biden cɛ, hali ni kaso hakɛ kɛra kan.
Nka repibilikɛnw ka jamanakuntigi kɔrɔ tora a ka kuma kanw kan jalakili fɔlen kɔfɛ. A bɔlen kiritigɛso kɔnɔ, Donald Trump y'a jira ko nin jakili min kɛra kan maloya don. Wa a ko mɔgɔw k'u hakili sigi, baw kiritigɛ lakika bɛna kɛ novembre kalo tile 5 la, san 2024 la, jamanakuntigi kalata don. Kiritigɛso dala, waati min a fɔra ko Trump jalakira, a sinaw ye wulikajɔ kɛ, k'u nisɔndiya jira.
Tile fila kiri kɔfɛ, kiritigɛlaw 12 ninnu bɛɛ ye jalakili 34 ninnu sɛmɛntiya Donald Trump kan kiri in sen fɛ. K'a ye jatebɔ sɛbɛnw nanbara, o kɔsɔn ko Donald Trump ye dollars wari 130.000 dogo ka di porno filmu bɔla min tɔgɔ Stormy Daniels ma, walasa ka cɛnimusoyako mankan dɔ bali san 2016 jamanakuntigi kalata kanpaɲi laban na.
Kiri in na, Donald Trump bɛ se ka san 4 kɛ kaso la, alamaani fana bɛ se ka daa kan. Nka kiritigɛla bɛ se fana ka ɲangi hali n'a ma don kaso la, bɛɛ ka nafa kɔsɔn.
Novembre nata, kiritigɛ in bɛna bɛn jamanakuntigi kanpaɲi waati nafamaw de kɔnɔ, bawo baro kɛnɛ fɔlɔ bɛna kɛ Donald Trump ni Joe Biden cɛ juin kalo tile 27 la, ani Repibilikɛnw ka lajɛba bɛna kɛ Milwaukee dugu la, juillet kalo tile 15-18 la, nafolotigibaa Donald Trump ka pɔlitiki tɔn mɔgɔw bɛna sugandi u ka cɛbɔya la jamanakuntigi kalata in na.